LU CORI E LA TESTA

Diu l'omu plasmò dopu tutti 'i 'nimali,

a ogni razza criata fu superiori.

Di l'umana forza, su' ddui li signali:

pur s’ a li voti no’ sà,  ha 'na testa e nu cori.

 

Nc'è troppa genti chi sempri rici:

“Sii furbu, la testa tu ha' da usari.

Li to' iorna, vedrai, non vivi felici

se cu la 'mpigna non sa ragiunari”.

 

“Usa 'a muruddha e vedrai, basta pocu

p'aviri ragiuni di cu' è cchiù forti.

Di tutti l'atri ti farai cusì iocu,

comu tanti 'gnuranti, poviri storti!”

 

Ma ognun chi si criri cusì 'ntelligenti,

'a gioia n'a 'ccatta, non scansa 'u duluri.

'Chì la furba ricchizza, non servi a nenti,

resta 'nzipita 'a vita, senza sapuri.

 

Troppa genti mi rici “Non ha pinsari,

s'usi sulu 'a ragiuni, com' omu non crisci.

Fatti diri ru cori la strata ch'ha fari.”

Ma 'u cori, da sulu, poi ti trarisci.

 

Pirchì quand'è troppa 'a forza ru cori,

chi li vini ti inchi ch’ ‘a gula t'i 'ngruppa,

la fini tu fai di ddhi poviri tori

chi 'u russu ru sangu l'occhi nci stuppa.

 

Sì, senza vardari, fui p'a to' strata,

comu 'n orbu camini, tu nta lu scuru.

Sulu t'accorgi ch'è chiddha sbagghiata,

quandu sbatti e ti 'cciunchi, cuntr' a nu muru.

 

Cusì spessu la testa mali si usa,

e 'u cori si sperdi, si menti da parti.

E se fora si tira, è sulu 'na scusa,

custumi di scena 'i cu' recita ad arti.

 

Comu ha già scrittu pi l'omu 'a Natura,

di gioia, alla fini, 'n cacchi iornu nci resta,

a cu' pensa ed agisci cu giusta misura

e insiemi li usa: lu cori e la testa.