Trasparenti è 'a lacrima,
non avi culuri,
sia di cuntintizza oppur di duluri.
E' zinghira 'a lacrima,
non avi nazioni,
chi sia di gioia o di commozioni.
Non cangia 'a lacrima,
non fa' differenza,
chi sia di sollievu o di suffirenza.
'Mprovvisa è 'a lacrima,
no, non avverti,
pur se si sta sempri cu l'occhi 'perti.
Curiusa è 'a lacrima,
ha 'n sapuri stranu,
chi sia d'animali oppur di 'n cristianu.
Non è 'nsipita 'a lacrima,
'u sa' cu' l'ha pruvata:
p'ogni punta di lingua, esti salata.
Silinziusa è 'a lacrima,
non faci rumuru,
no, quandu nesci ru cori cchiù duru.
Virgugnusa è 'a lacrima,
non si fa viriri,
di notti spunta, prima 'i durmiri.
Signu è 'a lacrima,
di successi e scunfitti,
dill'omini tutti: ri fissa e ri ddritti.
Cumpagna è 'a lacrima
di la vita nostra,
nta 'n mundu chi gira comu 'na giostra.
Giusta è 'a lacrima,
è nda tutti li facci,
nda l'occhi ri ricchi e ri poviri e pacci.
Specchiu è 'a lacrima
e nte so' riflessi,
si viri ch' o' mundu simu tutti li stessi.
Nessun commento:
Posta un commento