25 dicembre 2006

AFRICA NIRA BLUES

Africa nira, Africa nira,
terra di suli e di spazi ‘perti,
tuttu a la storta a tia ti gira,
luntana si’, oltri mari e deserti.
Africa nira, Africa nira,
terra ‘sì grandi, cusì serbaggia,
aundi pisanti è l’aria chi tira,
c’è disperazioni e tanta raggia.
Africa nira, Africa nira,
terra ‘sì china d’umana ricchizza,
tu chi pigghiata fusti di mira,
ciristi viatu pa to’ debulizza.
Africa nira, Africa nira,
terra ch’è ‘a culla ra civiltà,
senza cchiù sciatu, chianu suspira,
‘chì fu ‘bbandunata dall’umanità.

Africa nira, Africa nira,
terra malata, su’ pocu li sani,
povira genti chi di fami grira
e mori, sì ma cu mitra nte mani.

Africa nira, Africa nira,
terra pricchia di acqua e di sciuri
'u generali o’ cumandu aspira,
ra so’ stessa genti è dittaturi.
Africa nira, Africa nira,
terra di pisti, di stritti sinteri,
cu l’occhi schiantati ognunu s’aggira,
‘ill’ennesima verra si fui tutti a peri.
Africa nira, Africa nira,
terra oggetto di vani cunquisti,
mamma d’atleti ch’ u mundu ammira,
‘i torti ru mundu tu li subisti.
Africa nira, Africa nira,
terra da sempri umana tragedia,
senza mercatu no, non attira
tutti lu sannu ma nuddhu rimedia.

Africa nira, Africa nira,
terra ch’è ancora in cerca di pani,
spirduta genti chi di fami grira
e mori, sì, ma cu mitra nte mani.

Africa nira, Africa nira,
terra di zebri, ghepardi e giraffi,
aundi ‘u liuni all’umbra si stira,
su tutti regna, ddhiccandusi ‘i baffi.
Africa nira, Africa nira,
terra ch’è casa di sofferenza,
mandamu aiuti e ‘ncacchi lira,
tinimu a bada la nostra cuscenza.
Africa nira, Africa nira,
terra ch’è ‘n puzzu, sì senza fundu
pu riccu ‘mbrugghiuni –comu si fira?-
chi ad arti ti chiama ancor Terzu Mundu.
Africa nira, Africa nira,
terra chi cerchi simenza e cuncimi,
ch’aspetti mi cangia stu ventu chi spira,
‘u iornu ch’i terzi sarannu li primi.

Africa nira, Africa nira,
terra ‘i tribù e di saggi sciamani,
povira genti chi di fami grira
e mori, sì ma cu mitra nte mani.

Africa nira, Africa nira,
terra di virdi quasi spugghiata,
si’ comu a ‘na candila di cira,
chi chianu si stuta, tutta squagghiata.
Africa nira, Africa nira,
terra mischina, subisti ‘n dispettu:
li to’ mari figghi, quandu fa sira,
mancu la pagghia hannu pi lettu.
Africa nira, Africa nira,
terra sberleffu ra "gran società",
ma cu ti rispetta, certu s’adira
‘chì ra to’ genti sa la dignità.
Africa nira, Africa nira,
terra da Diu ‘sì mal trattata
pirchì ‘a genti chi ccà sa tira
sappia ch’è stata assai furtunata.

Africa nira, Africa nira,
terra i cu’ campa peggiu ri cani,
spirduta genti chi mancu cchiù grira,
'chì di fami mori, cu mitra nte mani.

    24 dicembre 2006

    BUON NATALE

    In una fredda notte stellata
    ov'è silente, fiduciosa l'attesa,
    una speranza è nel caldo riflesso
    della debole luce d'una fiaccola accesa.

    Poi in una grotta a stento scaldata,
    quel silenzio di speme è rotto d'incanto:
    povero e nudo un bimbo v'è nato,
    segno di vita, gioioso è il suo pianto.

    E quella notte nel tempo lontana,
    in cui venne al mondo Gesù Bambino,
    ancor si ricorda 'ché per noi rinasce
    colui ch'è la luce del nostro cammino.

    In questa notte di festa e speranza,
    di gioia pura nel senso più vero,
    quest'augurio di buon Natale,
    giunga agli amici e al mondo intero.